BODEGAS TERRAS GAUDA

de BODEGAS TERRAS GAUDA

Transcorrido un ano desde o inicio do proxecto de I+D sobre a selección clonal da variedade Albariño, os resultados parciais obtidos son alentadores, tanto no aspecto agronómico como enolóxico.

Dos estudos realizados en campo debemos destacar tres apartados nos que se presentaron importantes diferenzas entre os clons.

Observamos diferenzas significativas entre os clons para o parámetro de resistencia natural a enfermidades, presentándose clons con elevadas porcentaxes de incidencia a Mildiu o Botrytis, xunto a outros (polo menos dous) nos cales a incidencia de enfermidades é mínima.
Canto aos estados fenolóxicos (follas visíbeis, floración, maduración, etc.), todos os clons avanzaron do mesmo xeito até chegar á floración. A partir deste momento presentaron marcadas diferenzas, chegando mesmo a casos coma o de dous clons que, sendo os máis atrasados en chegar ao estado de premaduración, sorprendentemente, foron os primeiros en madurar plenamente.
Respecto ao peso de acios dos distintos clons, atopamos grandes diferenzas, chegando ao punto de que o que presentaba maior peso duplicaba ao clon co acio menos pesado.

Nas análises realizadas aos mostos e viños elaborados a partir de cada un dos clons, destacan catro variábeis de grande interese.

Os valores de rendemento (litros de mosto obtido en prensa/kg de uva do clon) amósannos importantes diferenzas, destacando sobre todo dous clons cun rendemento moi elevado e outros dous de rendemento baixo.
O valor de grao probábel en mosto obtido de cada clon xa presentaba grandes diferenzas. Ao se transformar en viño, as diferenzas confirmáronse, de xeito que atopamos un viño procedente dun clon cun valor de 13,9 de grao alcohólico, fronte a outro cun valor de 12,5, o que supón unha diferenza vistosa entre clons.
Respecto ao parámetro de acedume total, a sorpresa aínda foi maior, xa que a diferenza supuxo atopar un viño procedente dun clon con valor de 11,6 gr/lt xunto a outro con valor de 8,1 gr/lt. O que supón unha diferenza porcentual do 43% entre o viño máis acedo e o de menor acedume.
Por último, un parámetro que consideramos fundamental para a nosa investigación, como é o dos aromas dos viños procedentes de cada un dos clons, presentou notábeis diferenzas tanto na análise por cromatografía de gases como na cata realizada para cada un dos viños. Aínda que resulta complicado resumir as diferenzas, debemos sinalar que os aromas dominantes para cada viño variaron desde os nítidos recordos cítricos até os marcados florais, pasando por viños cun forte carácter balsámico.

Paga a pena facer mención a un clon que nos proporcionou o viño de mellor calidade na cata. Cruzando os datos agronómicos cos de aromas, resultou que este clon presentaba o acio de menor peso e as bagas máis pequenas, co que a porcentaxe de pel é moi elevada. Sabendo por outra banda que os precursores de aromas se atopan en gran medida precisamente na pel, a conclusión é que probabelmente no aspecto aromático debamos fixarnos máis en clons con estas características particulares de acio e uvas pequenas.

De todos os xeitos, debemos ser cautos á hora de establecer conclusións, debendo esperar a dispor de datos dos próximos anos, para comprobar se o comportamento dos clons que parecen máis interesantes se mantén.

Bodegas Terras Gauda
Por mor do interese que sempre amosou TERRAS GAUDA cara á investigación e mellora continua, e aproveitando os recursos naturais que nos ofrece a nosa zona de producción, expúxose a necesidade de seguir varias liñas de investigación cunha clara aplicación práctica.

Por unha banda, TERRAS GAUDA actúa como empresa colaboradora co Centro Superior de Investigacións Científicas (MBG) (www.mbg.csic.es) nun proxecto coordinado sobre a Recuperación e estudio de variedades autóctonas minoritarias de vide, orientado cara ao noso Caíño Blanco. Nel asesoramos en todo o que se refire ás microvinificacións e ás análises químicas e organolépticas.

Bodegas Terras Gauda Pola outra, e dentro do Plan Galego de I+D+I (sug.cesga.es), atopámonos inmersos nun proxecto de I+D a tres anos sobre a Selección clonal da variedade Albariño, para o que contamos desde o ano 1992 cunha parcela experimental composta de 115 clons distintos, dispoñendo ademais dunha adega experimental para realizar as microvinificacións dos distintos clons. Pretendemos comprobar se as plantas estudiadas son ou non Albariño (mediante técnicas de ADN), ou se están libres de virus, e coñecer tamén as características de cada un dos clons no ámbito de resistencia a enfermidades e, sobre todo, canto ao nivel de calidade dos mostos e viños obtidos. Isto permitiranos establecer, mediante enxerto, en futuras plantacións, aquel clon ou clons que teñan as características que mellor se axeiten á liña de viños que elaboramos, buscando unha marcada singularidade.

Como continuidade na liña de investigación, e enlazando co proxecto anterior, na actualidade estamos trazando o camiño cara á investigación sobre a Selección e illamento de levaduras ecotípicas procedentes do noso viñedo, na que estudiaremos a flora de levaduras, seleccionaremos as colonias para o seu illamento e, logo dos ensaios de vinificación, poderemos dispoñer da levadura seleccionada idónea para conseguirmos un maior control do proceso fermentativo, e unhas características organolépticas do viño final diferenciadas, que lle engadan personalidade.